Euskal Herriko Hezkuntza eta Kirol Fakultateek eta Euskal Herriko Jarduera Fisikoaren eta Kirolaren Zientzietako Lizentziatuen Elkargo Ofizialak (COLCAFYD) adierazpen bateratua sinatu dute, haurtzaroan kirol-espezializazio goiztiarraren aurrean praktika multidiziplinarraren alde egiteko.
Adierazpen honetan, beren babesa argi eta garbi adierazi dute jarduera fisiko eta kirolean hastapen eredua praktika multidiziplinarrean (Multikirola) oinarritzearen alde, 13 urte baino lehenagoko kirol-espezializazio goiztiarrak dakartzan arriskuen aurrean. COLCAFYD Euskal Herriak bultzatutako ekimen honek aurrekaririk gabeko jarrera instituzionala adierazten du euskal eremu akademiko eta profesionalean, haurren kirol garapenari buruzko nazioarteko ebidentzia zientifiko berrienarekin bat eginez.
Adierazpena azken urteotan nazioartean metatutako ebidentzia zientifiko zabal eta sendo batean oinarritzen da; izan ere, ikerketa ugarik sakon aztertu dituzte espezializazio goiztiarreko ereduek eta kirol anitzeko praktikak errendimenduan, osasunean, kirol-ohituretan eta haur eta gazteen garapen integralean dituzten ondorioak.
Ondorio horiek guztiak “Kirol hastapena: errendimendurako, osasunerako, kirol-ohituretarako eta garapen integralerako jarraibideak” izeneko txosten teknikoan jaso dira. Txosten hori Euskal Eskola Kirolaren Batzordeak sustatu du eta Eusko Jaurlaritzak argitaratu du.
